Паводле праваабаронцаў «Вясны», сярод трох дзясяткаў памілаваных 22 лістапада ўкраінцаў толькі дзесяць затрыманых і асуджаных з палітычных матываў.
22 лістапада Лукашэнка памілаваў 31 грамадзяніна Ўкраіны, якіх трымалі ў месцах зьняволеньня Беларусі.
Раней паведамлялі аб вызваленьні пяці палітвязьняў: 18-гадовай Марыі Місюк, асуджанай на 13 гадоў калёніі; Міхаіла Сталярчука, асуджанага за «агентурную дзейнасьць» на шэсьць гадоў зьняволеньня; Лідзіі Грук, затрыманай і асуджанай разам з мужам, які застаўся за кратамі ў Беларусі; Аляксандра Катовіча, асуджанага за камэнтары на пяць гадоў калёніі; Анастасіі Кашчынай, асуджанай у «справе Гаюна».
Праваабаронцы даведаліся імёны яшчэ пяцёх вызваленых. Гэта Сяргей Кузьміч, Аляксандар Крывіч, Надзея Нікалаюк, Касьян Кулікоўскі, Сьвятлана Міронава. У чым іх абвінавачвалі, праваабаронцам невядома.
«Вясна» пісала пра палітычны перасьлед Надзеі Нікалаюк. Як даведаліся праваабаронцы, жанчыну з трэцяй стадыяй анкалёгіі пратрымалі ў ізалятары на Акрэсьціна ў дэпартацыйнай камэры 57 дзён. 26 сьнежня 2024 году яе перавялі ў СІЗА КДБ. Адтуль жанчыну пад канвоем вазілі на хіміятэрапію, але яна выбілася з графіку ў тры тыдні. Жанчыне казалі, што яе перавядуць у СІЗА КДБ у Берасьце, але іншыя зьняволеныя потым яе бачылі ў СІЗА ў Калядзічах.
«Вядома, што Надзею абвінавачвалі ў „агентурнай дзейнасьці“ — нібыта яна перадавала зьвесткі ва Ўкраіну. Зараз Надзея на волі ва Ўкраіне, але яе дом застаўся ў Беларусі, дзе яна пражыла 20 гадоў з дазволам на жыхарства», — піша «Вясна».
Праваабаронцы высьвятляюць абставіны палітычнага перасьледу ў Беларусі астатніх чатырох вызваленых украінцаў .
Сьпіс грамадзянаў Украіны для вызваленьня фармавалі ўлады Беларусі.
Форум