Адрасы крыптабіржаў Bybit, BingX, Bitget, Okx уключаныя ў сьпіс забароненых на сайце БелДІЭ (Рэспубліканскага ўнітарнага прадпрыемства па наглядзе за электрасувязьзю).
Аб абмежаваньні доступу да шасьці сайтаў паведаміла 11 сьнежня Міністэрства інфармацыі. У паведамленьні ведамства зазначаецца, што рашэньне аб блякаваньні прынятае на падставе апавяшчэньня Менскага гарвыканкама, які «выявіў на інтэрнэт-рэсурсах okx.com, bitget.com, bingx.com, bybit.com, weex.com, gate.com наяўнасьць неналежнай рэклямы».
Пры гэтым апэрацыі з крыптавалютамі ў Беларусі застаюцца легальнымі. Дэкрэт Лукашэнкі № 8 «Аб разьвіцьці лічбавай эканомікі» дазваляе бясьпечна купляць і прадаваць крыптавалюты праз рэгуляваныя плятформы.
Цяпер доступ да названых сайтаў зь Беларусі немагчымы.
Крыптабіржай лічыцца онлайн-плятформа, дзе людзі купляюць, прадаюць і абменьваюць паміж сабой крыптавалюту. Яна выглядае як звычайная біржа ці абменьнік, працуе ў лічбавым рэжыме. Крыптабіржа злучае тых, хто хоча купіць крыптавалюту і яе прадаць.
ГЛЯДЗІЦЕ ТАКСАМА: Ад «ІТ-каталізатара» да «крыптамахляроў» і падзеньня экспарту: Як зьмяніўся беларускі Парк высокіх тэхналёгій ГЛЯДЗІЦЕ ТАКСАМА: Нацыянальны банк Беларусі заклікаў мэдыя «адказна выбіраць тэмы» пасьля першакрасавіцкага жарту пра крыптавалюту «зубр»